米高大喜日子@012315

恭喜哂~
今日係我同事米高既大喜日子,
數數手指, 同佢做咗同事超過十年..... (唉吔....好似好老咁)
上台影大合照真係舊同事又係, 新同事又係 (最愛詭影相)

今次仲見到好多舊同事,
一齊好開心咁過咗一晚
祝林生林太百年好合, 永結同心呀~

一人一花計劃 - 萬壽菊 - DAY@1.23.15

一人一花計劃 - 萬壽菊 - DAY@1.23.15
 
今年既一人一花計劃又開始啦
上年既賴鳳仙仲健在~
可以同新住客賴小菊一齊啦~

婆婆話朗朗嗰棵特別細,
得嗰幾塊葉仔喎,
都唔緊要啦, 我會好俾心機,
努力咁揍大你~
 
一人一花計劃 (2014/15)
萬壽菊資料單張
 

揍仔同揍老公都好辛苦架.....

話說去南生圍嗰日,
朗朗喺mm 屋企, 倒瀉汽水喺佢張梳化度,
而被爸爸打面
過程唔重要, 最緊要點善後….

嗰日返到屋企,

上床訓時, 我幫朗朗 “了” 耳仔 (只用手指, 佢最愛)
一路問返當時既情況
朗朗講講吓喊咗出嚟
我呵返佢, 同佢講, 爸爸見你唔小心整污糟咗媽媽朋友張梳化,
心急起嚟, 怕媽媽會被mm 姨姨責怪,
所以咪大聲咗啲,
但你亦有唔啱, 仲倒瀉野, 而你又用8號聲喊
(朗朗話佢只有3號聲, 而我話我喺出面都聽到)
所以爸爸先打你面珠
爸爸亦有唔啱既地方, 我會同佢傾
但你亦要小心啲, 以後唔好再咁做

不過, 媽媽亦好欣賞你, 聽爸爸講親自向mm姨姨道歉
你咁做係勇於承擔既表演, 好有勇氣, 好抵讚

同埋嗰日全部小朋友又去搭船仔, 又去影相

而朗朗又刮樹皮,
再去mm 姨姨跳跳跳, 又bbq
又cars 又frozen, 仲有禮物收, 好開心呀~
***我之前睇ricky sir 話要為個event 下返註腳,
唔好俾啲唔開心既事影響, 令佢日後只諗返某啲event 啲唔開心野**

之後到老公, 我一路按腳一路同佢講

(基本上氹仔同老公係同一樣動作)
佢有問返我朗朗講乜,
而我亦有講, 我都知你好興,
但係一把打落個仔度, 佢會好有屈辱感
當年我娘親咁打我, 我到現在仲記得,
你仲要當住咁多人面前打
真係好想你可以唔好再咁

仲有, 兩個仔bb 時都好痴你,

大大吓朗朗好似有啲怕咗你咁
其實你都好錫個仔, 如果吓吓只靠威嚇
咁小晞慢慢都會怕埋你,
你都有上ricky sir 啲堂, 應明白我講乜
而少啲用iphone, 多啲陪佢玩
嗰吓佢好好聲氣咁應咗我

之後幾日, 佢一反常態勁有心機/耐性對啲仔,

而朗朗亦勁痴個老豆……
我真係好開心, 希望可以一直keep 到

我細個被娘親打到七彩,

因我係一個”一言九鼎” 既人
嗰陣嫲嫲會攬住我, 話媽媽係衰人, 咁打個女,
而我亦被洗腦, 覺得媽咪好衰

但後來嫲嫲唔理我哋,

我先意識到愛既係媽媽
但如果嫲嫲一直同我一齊, 我係可能一路都唔鍾意媽咪
所以一定要好好教育個仔, 唔想佢有個感覺
覺得爸爸好衰