產假只剩下一個星期

現在係凌晨時分, 剛剛泵完奶, 老公又餵完曉朗, 咁啱撞正阿仙奴, 咁我就寫吓 blog 先。
仲有一個星期就要返工啦, 開始唔捨得個仔添......唔生咗個仔出來都唔領會到, 點解有 d 人會做做吓野, 生咗個 b 出來就唔做, 可能好似我咁有呢個想法, 唔捨得個 b。

佢前日打完針, 我 keep 住 check 佢體溫, 真係好驚佢發燒。肉赤死我架嘛。
現在有 d 擔心自己個甲狀腺問題, 即刻諗.....我唔可以有事架, 我先啱啱生咗個仔出來, 仲有同老公相處既時間好短, 好想用我呢一生既時間同佢一齊過, 而佢又成個細路咁, 我要好好照顧佢架。

唉....開始胡思亂想, 其實我妹妹都同我講咗, 佢有個同事都係咁, 生完仔之後個甲狀腺又係有問題, 食兩年藥控制住。

今日去咗圓玄學院同老公拜太歲, (應該係昨日先啱) 昨日係星期六, 約咗細妹上午 10:00 o係佢o個度等, 我就住返工o個 d 星期六又有可能要返工, 未夠鐘放工; 唔駛返工o個 d 要去都去咗啦....呵呵呵, 去到唔多人, 好快咁完成, 去到千色店都唔駛11:30。

千色店都有幾多 bb 野買, 不過唔夠一田同永安咁多野買。同埋唔係好明, 掛哂 d "sales" 既牌, 但 bb 野無折.....咁平咗去邊呢?

之後去埋葵涌廣場買 bra, 要返工啦, 用緊 o個 d 承托力不足, 著衫唔好睇。

公司 3 月8 日有個 bbq night o係尖咀搞, 問我去唔去, 我諗我都係會回覆唔去啦, 真係想o係最後既假期見多個仔耐 d。