廣華第四次產檢

今日係o係廣華第四次產檢, 撞正我個美國客又 1st day in office, 不過我唔理啦, 話哂現在乜野都孩兒行先, 難得阿姐又無講乜野, 我咪照放全日囉。

今早好凍呀, 不過我都係著住件短袖 tee 加毛毛背心咋, 出門真係有 d 寒, 但去到旺角已經覺得有 d 熱.....

今日早咗少少到, 約咗10:30, 早 dd, 去到好多人, 好少等驗尿到咁多人架嘛, 到叫我名, 我見到個紙 file 上寫咗 "同名同姓", 我心諗, 唔係咁啱又有人同我同名呀化, 讀書o個陣已經撞過兩次, 又來?! 到量埋血壓, 今次係 139.....剛剛唔超, 好在啫。 自己去咗磅重, 今次係 79 kg, 比上次重咗 1 lbs 到啦.....咁我去攞兩本書睇時, 又聽到個姑娘叫我個名, 我裝個頭去, 佢地又無反應......到我坐埋住, 又聽到叫我去量血壓.....我以為係同名同姓, 咁個 file 上寫架嘛.....到叫第二次我咪行埋去囉, 我見個file 入面已經寫咗我個血壓, 俾 d 姑娘激死, 都唔知係咁太多人做到傻咗。

又等咗一陣, 入房見醫生, 醫生話上次驗血, 血糖同血色數正常, 姑娘問我 12個鐘阿 b 有無郁夠 10 次, 咁老實我又無數過, 不過都應該有既。之後訓上床, 姑娘按吓我個肚, 又俾我聽吓阿 b 既心跳, 嘻嘻, 好得意呢, 毎次都好想聽到架。

到個男醫生 (係呀, 次次都係女, 今次係個男) 按我個肚同量肚, 佢按住我恥骨個位時有 d 痛, 佢話係咁架喎。再之後係咁按我個肚, 我諗佢應該係按吓個 b 既頭仔掛, 因為佢問我有無o係出面照 u/s, 知唔知個頭o係邊.....佢按得好大力吓......有 d 痛。

最後醫生話要我做功課, 毎日寫低o係佢地俾我張紙, 阿 b 有無郁夠10次, 姑娘仲話唔夠要入院唔好嚇我啦~

睇完又唔駛 1 粒鐘, 去咗隔離彩豐行, 點知檸薑沐浴露賣哂, 唔知幾時有貨, oh.....我唯有買定檸薑洗頭水同蔗糖沐浴露先啦。

順便我去埋銀座廣場攞埋 baby-mo, 又俾我買咗兩樣野...老公話 ck suit $59 好平, 又買咗個睡袋。wow ~